美國商務部上周五又多28間公司列入實體清單，其中有浪潮（596）母公司在內，浪潮股價一度急跌17％。其實自美聯合日，荷開始對華在新一輪晶片制裁後，雙方都開始相互出招，當然主導權喺美國身上，到周末，美國正研究擴大對華嘅限制範圍，包括限制Nvidia向華為出售技術，亦可能禁止美國對敵對國家進行某些領域上任何形式嘅投資，計有先進半導體、超級計算，同埋人工智能等。

美債息連續兩日回落，10年債息跌至3.96厘，美匯回到104.53，幫助股市繼續反彈，上周五道指再升387點，差不多行返去區間中軸，下面325至32600係重要支持。納指升近2％，舊年10月起4個月內做咗個W形底，頸線約11500水平，依家失守後收復，現正處於阻力變支持嘅反覆測試階段。Tesla 二月中國廠房交貨升，大行重新睇好蘋果毛利率上升，兩大巨頭帶動大市向上。

美10年債息破4厘後回落，唯見30年債息開始追唔到升幅，反映10年債息已幾近浪頂。睇番股市表現，上年10月美10年債息升穿4厘時，S&P接近3500點，依家接近同一水平時， S&P已4000點，市場明顯適應咗高息環境，相信明年會落實減息，亦相信企業盈利並未有預期最差嘅幅度下跌，前兩者相信會發生機率相當高，企業盈利則為後市走向嘅主要關鍵，而文初提到嘅中美持續保護主義亦會成為企業盈利因素嘅一部份。

港股上周低開高收，可惜周線圖以破腳開出，未能穿頭收，恒指日線則升穿22700拉落嚟嘅下降阻力，黑期多升100點到20650水平，同預先講的一樣，20天線20750，50天線20900乃重要分界線。

上證指數喺兩會前已破位上，下一目標為3060。兩會亦於周末展開，為期8日，工作報告中嘅主要項目包括恢復同擴大國內需求消費，促進綠色低炭發展；優化5G同全面覆蓋計劃，並開始6G的推進同研發；增加軍備開支，並落實全年經濟增長5％的目標。

今早外圍恒指蒸發咗隔夜升幅，重回20500點水平。