港股急升一日後，未有再follow上，恒指以貼近10天線（20370）低開後一度反彈上20550，收20441，跌176點，全日波幅收窄到200點，成交亦減至1,100億元。月初市，好友未有承勢追殺，淡友都未有反擊，恒指急升後做咗枝十字星待變，應該唔會等好耐，預計下周中前應該出到方向，依家水平睇，上面50天線（20869），下面250天線（19939）係波幅區域，上破、淡倉一定要停再睇，相反下破好倉就要止。

人工智能概念開始靜落嚟冷靜吓，科技股冇睇頭，況且電商燒錢戰令幾隻電商股升一日就冇力，巴巴（9988）同京東（9618）同跌4％。嗶哩（9626）業績前跌7％，好似知佢一定唔好咁。結果嗶哩去年第四季虧損收窄至15億元人民幣。

週末阿爺舉行兩會，估計都是一些大方向為主，會前數字中國概念率先炒上，小心下週起開始回來散水，電訊股係收益穩定但長遠變化唔大嘅行業，每當短期升幅過大，都係減磅機會，等低位再撈。

美債息繼續高企，30年債息升上4厘，而10年債息上到4.09厘。同樣歐元區二月份通脹放緩較預期慢，短期仍要加息機會無可避免。美匯曾升穿105，今早做104.95，歐元1.06，日圓136.6，而人民幣前幾日累計回升1000點子後，都回落到6.92水平。

美股在息囗高企下，道指上升340點，暫時仍未走出去年11月至今的大型橫行區，下方支持32600內平。Tesla新發展藍圖未有驚喜，曾一度跌8.3％，收市跌近6％，納指都由跌轉升84點。

反而中概股指數就抽高2.66％，百度升至約147港元，而嗶哩業績後先跌後升，折約港元175元。恒指夜期升200點，而黑期就升上20650水平。