前晚恒指夜期同黑期都係偏淡少少，但噚日開市前見期指已升過百點，到現貨開市頭半個鐘已升穿20200，跟住就一步一步行上去，期間國內公佈製造業同非製造業採購經理指數，全部都喺50盛衰分界線之上，而且高於市場預期，解讀係中國復常後整個經濟活動都比預期好，上證股市承前日升勢再行，終於升破3010，收3012，圖表上係破咗位，唔理佢係破位定係炒兩會，企得到喺3010上面，國內股市就唔可以睇淡住，而人仔反彈都幫到手。

恒指大升 833點，收20619，仲有大成交1500億元配合，噚日都已經講咗，佢要彈，唔會比你買到19600呢個全世界都睇住個位，買到嘅一定唔只19600，結果恒指小時圖以6支大小不一陽燭上，段段有力，佢反彈就冇得擋。三月開局大升，跌就慢跌，升就一棍升晒，淡友暫時只係當二月跌市後嘅反彈，係彈完跌定跌完升，要睇多幾日先知，上面20天同50天線喺20880同 20850，升得穿淡倉一定要先平，寧願佢掉頭時再做過淡。但睇恒指周線圖，今周開19821，以破腳開出，如果聽日收市升得穿20973，周線圖開破腳穿頭，咁個市就有機會調整完，如果外圍又冇事，港股行自己路，升幅三浪等於一浪計，可以行到27000點。所以依家係走勢嘅臨界點，兩邊都有可能，我只係可以講到有機會會發生嘅情況大家思考下，不過最緊要係控制注碼。

個市大升，科技股就梗係領頭羊，騰訊（700）升7％（25元）成為升幅最勁，佢同美團（3690）如果今日收市升穿379同148元，就會做周線破腳穿頭，同上面講嘅恒指訊號一樣，有機會利好。其他板塊中，一直有留意的生科醫藥，醫療股都好似搵到個短底咁。

創科實業（669）公布截至去年底止全年盈利10.77億元美元，按年跌1.99%；每股盈利58.86美仙，派末期息每股90港仙。創科早前遭沽空機構Jehoshaphat Research狙擊，指創科在過去10幾年嚟，通過會計技巧誇大利潤，令到毛利率能夠每半年都有提升，令到有關成本隱藏或推遲數年，創科否認報告指控。

萬科（2202）擬配售3億股新股，每股配售價12.93元至13.2元，集資38.79億至39.6億元，折讓5.04至6.98％。

美匯回軟到104.34，人民幣一日內升值800點子，最新一美元兌6.87人民幣，英鎊1.2，日圓報136.25。歐洲通脹繼續升溫，美十年債息3.99厘，美股反覆，納指繼續受壓。