A股噚日靚仔啊，先跌落去，下午兩點後抽上，倒升27點，生科、電力同油股做好，上證收3279，一下子又上番10同20天線上，上面繼續睇3010，破唔到都係睇橫行市。

港股跟阿爺行相反，開高後唔去，未能確定係咪心同場外結算有關，下午阿爺升，佢就調頭向下，倒跌157點，果然係弱，成交千四億元，成交多係因有指數rebalancing 所致。噚日指數上一上250天線上，單日已經守唔住，繼續係條通道下方行。下面19600全世界圖表派分析都睇到，我覺得如果真係有支持，應該唔會到，好似前日咁，低開即彈。但係掂到19600就八成會再穿落去，可能到19000邊（就係去年10月同11月嘅反彈頸線阻力)，拉過嚟阻力就變支持。

國家廣播電視總局正研究加強短視頻管理，以防未成年人沉迷，一系列短視頻股受壓，嗶哩（9626）跌4％、快手（1024）跌3.6％、巴巴（9988）跌3.2％。阿爺發文支持數字經濟，一眾硬件，通訊器材概念股炒上，三隻電訊股反彈，但未扭轉近期跌勢。

內房同物管股受壓，一來先兩會前暫未有消息再救內房行業，二係恒大同債權人開會，債權人暫未接受恒大安排。另外內地保交樓研討會有議題建議將商辦樓改為住房用途，令潛在供應增加，依家內地房地產正處寒冬，再加供應有機會雪上加霜，整個板塊冇運行。彭博指旭輝（884）有永續違約風險，結果急跌16％，係成個板塊表現最差嘅一隻股份。

美銀料聯儲局會加息至近6厘，如果係真，影響都好大，市場concensus 暫時都係5.4厘左右。美股反覆向下，道指跌232點，納指微跌11點。反映中資股嘅金龍指數成個二月都跌咗10％，跌幅同港股差不多。

美匯104.68，英鎊1.21，日圓136.38，而人民幣就喺7算下徘徊，最新報6.96。