周五夜期跌到19700水平，到現貨開市19800之上，已經係全日低位，噚日期指結算，上星期五已壓到低位，今日到外圍結算，恒指仲未走出條下降通道，到今日條通道底喺19600（差不多又係回吐0.382位置），頂部喺20600左右，既然個市未轉勢，就繼續逢高沽，噚日既然唔跌，下個月有機會先行反彈，貼近10天線（20577）應該都有幾大阻力。

個市噚日算唔跌，科技股都有功勞，美團（3690）喺派現貨前都逆市升1％。百度（9888）彈2％，繼續圍繞個人工智能概念，騰訊（700）都話正在研發類似嘅聊天機械人，國內百度暫時攞正牌做，但中國個政治環境或者有更多制衡。睇番Google個聊天機械人都會發生錯誤，用最大數據去分析未必一定啱，相反係中國發展，可能會有政治層面或損害國家利益，甚至形象嘅資訊係唔可以出現，數據咁大情況下要排除這類資訊極度困難，一唔小心就會釀成公關災難。

信義系派成績表，信義光能（968）去年盈利38億元人民幣，按年跌22％。信義玻璃（868）盈利51億元，大跌56％。

市場已開始接受通脹會回落，但會較慢，同埋中途會有反彈，但大行繼續建議減持美股，美股噚晚曾反彈逾300點，道指納指同升72點，Tesla德國廠房提早生產達標，股價升5.5％。大摩瑞信繼續警告美股盈利能力未足以支撐現時股價，睇跌。另一個對沖基金Satori Fund預計標普最差會見3000點，現水平計最多可跌25％。

美匯回軟，最新報104.56，日圓136.33，英鎊重上1.2，人民幣微升上6.96。

中概股噚晚美股時段企穩，指數回升1.3％，黑期最新升60點，上到20000點。