中美關係未明朗之際，美國喺俄羅斯入侵烏克蘭一周年再宣佈制裁多名俄國官員同企業，將佢哋列入實體清單，估計其後唔排除對加大制裁同佢哋有關嘅中國企業。

美國一月份核心個人消費數字按年上升4.7％，較預期4.3％為高，再加上密竭根大學2月份消費信心指數創一年新高，更加確認市場對今年再加多三次25點子同息囗冇得落。美國十年債息迫近四厘，兩年債息4.82厘。環球未完全復常，商品價格已升，對壓通脹冇幫助，另外係工資增幅，我想部份係因為時代變咗，多人從事咗線上同自僱工作，勞動人囗減少，失業率自然低。依家聯儲局又暗示咗新一減息路線圖，就係2024同25年各減一厘，早前講過聯儲局話有意將通脹目標調升到2.8厘，暗示可能2厘嘅通脹目標大難達到，亦都令後年減到3厘目標變得合理。

美股受住短期息率上升壓力，睇爆邊都係向下機會較大，果然上星期五道指最多跌500點，收市跌336點，正考驗去年12月低位32582支持，納指跌近200點，息囗遲見頂，早前過早炒起，依家要還。美匯升上105.32，人民幣6.97，日圓136.5，歐元都失守1.06。

至於港股，上周五收市跌到20000點水平，隨着中概股金龍指數喺上周五美股時段跌近4％，恒指夜期同外圍黑期都跌到19700水平，差唔多到咗黃金比率回吐0.382嘅19600位置，亦都貼近下降通道底部位置，今日期指結算，睇下到支持後頂唔頂得住。

恒指季檢後成份股不變，仲係76隻，至於國指就加入小鵬（9868），而剔出飛鶴（6186）。

海底撈（6862）預期舊年轉賺13億元人民幣，集團新嘅開分店同控成本整頓計劃開始湊效，而當中亦包括咗3.3億元注銷票據收益。