期指愈近結算愈反覆，上午曾反彈上20600，前日高位20620都升唔穿，下午又跟國內股市回軟。上證噚日日最高3007，又係衝唔穿3010阻力，暫當係阻力前回吐，10天（3276）同20天 （3268）線都仲守到。港股午後升幅完全歸零，倒跌72點收，大科技股跌過又升過，收市近打平，係巴巴（9988）升到2％最勁。前日提到高位要食嘅中資電訊股，有兩隻午後就玩瀡滑梯，聯通（762）同中電信（728）同瀉5％，AI概念呢幾日都冷卻咗落嚟，池塘水有限，升得多嘅當然會係減持首選。

另一個下跌焦點就係隻創科（669），理由係被沽空機構追擊，前幾日同類公司Home Depot公佈業績已經唔好，沽空機構 Jehoshaphat 指創科係大市值企業中罕有近十年每半年毛利率都有上升嘅公司，好到難以置信，話佢係通過會計技巧誇大盈利，包括數十億美元嘅開支資本化，令成本延後報銷。報告亦指公司近期拖欠同裁員情況嚴重，好快紙包唔住火，成個指控都好大，如果係咁大數目支出資本化，核數師冇理由過到，該報告預期佢有60至80％下跌空間。創科噚日股價由開始跌到尾，終於三點後就暫停買賣，停牌前跌咗19％。

網易（9999）公布，去年非公認會計準則下，歸屬公司股東嘅淨利潤228.08億元人民幣，按年升15.42%。每股盈利6.99元。

巴巴（9988）第三季盈利468億元人民幣，按年升69％，Non GAAP 盈利為499億元，按年升12％。巴巴ADR股價先6％後倒跌1％，走勢同前日百度一樣。

美股先升，Nvidia業績靚帶起美股早段升逾200點，點知未到中段已轉跌，尾市拗腰轉升，道指升108點，納指升83點。成個市都被通脹，息囗影響住，早前過早預期息囗見頂，個市炒咗上去，依家還原基本步，其實都係講緊差25點子左右。睇番基本面，即係業績，美股可能仍要回落10％。美匯變動不大，處104.5上落，其他主要貨幣都係。