財爺講嘢冇驚喜，要免嘅一如以往，繼續派5,000蚊消費券，交易徵費冇得減，市場人士話下年先有機會減，原因好簡單，上年加完，今年即減，即係默認決策錯誤，冇face，另一方面加足球搏彩稅，馬會即刻出嚟發聲。

美國搬龍門下，通脹都未落得預期咁快，息已加，只係一月中國復常，生產力回升，一定都會帶起全球資源價格，咁通脹回落較慢都可理解。前晚有消息指有儲局官員提議將長期通脹目標由2厘升到2.8厘，估計係希望加少一、兩次息。最簡單，聯儲局最唔想見到係股市，樓市升，財富增加又會刺激消費，通脹就難壓。

國內股市連升兩日後調整，走勢未有改變，不過北向資金就淨流走。港股先跌一日，未有跟住外圍大跌，只係見佢唔多彈得起，收20423，跌105點，成交都係靜。科技股繼續受壓，騰訊（700）一度跌4％，收市跌1.6％，收番50天線上。京東（9618）玩自殘，再跌3％。美團（3690）一早跌得多，近日跌勢都放緩了，問題係下月初騰訊派出嚟嘅股份會出爐，高位跌咗三成，會唔會低沽，又或者一早已做定場外配置，局內人先知。

百度（9888）Non GAAP盈利207億元人民幣，同預期相約，第四季盈利我利按年升31％，仲會喺2025年底前喺市場回購唔多於50億美元股份。焦點文心一言將會同其他集團業整合，通過百度智能雲提供服務。百度股價ADR由升7.4％轉為倒跌2.6％。

恒指跌穿50天線後慢慢落，噚日下午見指數跌幅擴大，反而幾大科技股已冇跟跌，感覺如果外圍冇事嘅話，係有機會出反彈，250天線喺20000點左右，短線係咪一定到，冇人知，差幾百點係可以開始部署。

消息指中國傳要國企逐漸停用四大會計師行，或者擔心數據安全問題，但用其他會計師行（中國和香港），外資基金又可能冇信心，唔想再睇到政策觸發另一隻黑天鵝。

美股急跌一日後走勢未見好轉，道指繼續反覆尋應，納指則輕微反彈，港股黑期亦又曾升百點到最新跌50點左右。聯儲局會議紀錄顯示成員仲係非常擔心失業率低企問題，暫時未致於要上調加息50點子。美匯升上104.4，美匯強都係對股市唔好，紐約期油跌3％至74美元。