2023年03月29日

美股前晚冇市,上證行自己軌跡,雖然中段曾經一回,尾市仲可再抽16點,高收3306,正迫近春節回來後高位3010,衝破後A股又有另一個走向,問題外圍會唔會拖番佢落黎嚟?

國內股市好,港股就自己自殺,自身問題,與人無尤,京東(9618)大跌8.5%,消息指京東計劃下月初啟動百億補貼活動,同拼多多展開競爭,打減價戰,以本傷人,冇人得益,拼多多美股盤前都跌5%,拖累騰訊(700)噚日要跌15蚊,快手(1024)都跌6%。恒指又再失守50天線,下面250天線係20045,黃金比率0.382個位喺19600,呢兩個係下面嘅大位,今個月波幅1800點,技術上都滿足一個月波幅要求,感覺會係期結前一彈,結算後再算。今日開始有財爺預算案,幾大公司出業績,都對大市有影響。

滙控(005)去年稅前盈利175億美元,按年跌7.29%,較市場預期好,末期息0.23元,打算今年度起恢復每季派息,派息比率暫定為50%。今日有百度(9888)業績,佢業績一向冇驚喜,不過今次焦點就會放係集團未來放幾多資源在(文心一言)。

中國生物製藥(1177)旗下鎮痛同微循環領域治療藥物「利馬前列素片」(凱立通)獲藥監局批准上市,股價今早曾升逾3%。其他生科股都跟大市跌,早段板塊入面仲有股份升,下晝終於頂唔住,但噚日一跌有啲早前熱炒嘅生科醫療股開始到位,記得生科股喺嚿年11月下大市上升前已先行開車,相應亦早過大市見頂,如果今次又係早一步見底,有啲股份已可以𥄫實,包括有榮昌(9995)、康龍(3759)、雲頂(1952)、沛嘉(9996);跌得較少嘅康方(9926)同微創機械人(2252)都可以存記。

中證監啟動不動產私募投資基金試點,市場憧憬兩會前會有更多扶持政策,內房股早段集體逆市升,當然最後都難敵大市,未倒跌已幾好。阿爺又有對車企的新補貼措施,對特定車款作補貼,車股抗跌力強,跑出嘅係長汽(2333),逆市升5%,佢升可能同近期回購動作有關,近一星期已在市場回購咗逾8500萬股。

美股果然向下機率較大,終失守33900支持,大跌700點,而納指亦下跌265點,啱啱跌穿預設支持11570,市場繼續發酵息囗仲要多加0.5至0.75厘,高息率最少維持到年底,十年債息上到3.95厘,美匯升上104.17,日圓直逼135,英鎊強,企穩1.21美元,而人民幣就下跌至6.8934,人仔跌,美匯升,資源價格調頭向下。