噚日港股就真係一念天堂，一念地獄，上午中港股市一齊挾，唔知邊個係領頭羊，上證上到3308，直逼春節後復市高位3310，而港股都係勁，上午升近500點，升穿10天線，亦升到由22700高位回落嘅下降阻力，兩地股市正有突破嘅時候，午後返嚟究竟發生咩事，上證突然倒水，由升30點變倒跌50點，收市跌30點，突然跌得咁急，消息面欠奉，有人話內地早前炒AI概念嘅股份急跌，但睇板塊，跌幅都好全面，未知內地消息面有咩突變，但南水淨流入上海深圳兩地股市仍有68億元，莫非係內地資金撤退。

港股由升500點至只升175點，成交1,200億元。上次大升又係上星期四，第二日已經全部歸零，噚日更加一個下午搞店你，但相比上證計，佢又算係咁，起碼未倒跌，只係21000得而復失，調整路途係較反覆。

生科股繼續有壓力，日前急跌嘅騰盛（2137）彈唔起，又有一隻諾誠健華（9969）因被合作伙伴終止一種抑制劑嘅開發同銷售合作恊議而跌近三成，呢個係業務問題，同騰盛無端端跌大有不同，不過都對整個板塊構成影響。現時繼續等，等到目標股份開始跌唔落就可先下一注。

中國商務部將美國NLockheed Martin 同雷神列入不可靠實體清單，禁止從事對中國進囗和投資活動。

美國生產物價指數又超預期，令市場更多人擔心息口要到5.25至5.5厘才見頂，十年息3.85厘。美股又應聲下跌，道指跌431點，納指跌214點。美匯104，日圓134.12，英鎊明顯跌穿1.2，而人民幣亦回到6.875。