美國通脹數字公佈後，股市波動，較鷹官員都話要加多兩次25點子。CPI係改制後高基數下回落速度較預期慢，今年底前核心通脹落到3.5％已有一定難度，未來就要睇佔比率最高的租金下行速度有幾快。

上證指數調整，跌12點，回升勢頭未變。港股就明顯較弱，低開後再向下走，收市都係勉強頂得住20800第一關，但暫時都睇唔到有轉勢訊號，加上港匯又走弱，除非仍持有淡倉，而家買貨要有心理準備要捱。雖然納指升，但港股市場嘅科技股都要跟市跌，企鵝仔叫做最硬淨，跌幅較小。

前日突然急跌嘅騰勝博藥（2237）證實有大股東減持276萬股，噚日再跌22％，成億股成交，股東減持的股份數目不多，照常理未足以令股價兩日由高位跌四成，應該另有內情，而事件令到其他生科股都受影響，對於我哋等位買嘅係一件好事。

市場查到安踏（2020）係中央結算有8450萬股由外來存入系統，而持有咁大手嘅應該只有丁世忠同其關連人仕，令市場推算是否公司會配股或直情係汪生減持，安踏股價當然要跌。

中國官媒《證券時報》喺頭版發表評論文章指出，如何讓居民從超額儲蓄向消費轉化，已成為中國現時經濟工作重中之重，即係谷內需，進一步提振居民消費同投資。除咗增加消費券發放，鼓勵汽車消費等措施，今年有關方面亦可擇機降低利率水平，以降低經濟主體嘅債務負擔，為股市上行創造貨幣條件，表示中國仍有減息空間。

美股先跌後回穩，外圍恒指回升120點。美10年債息升上3.8厘，現貨金1837美元，美匯103.8，日圓繼續回落，去到134，人民幣6.86。