日本央行如預期提名植田和男為下一任央行行長，有人話佢係日本伯南克，即係鷹極有限。不過有日圓先生之稱嘅榊原英則預計日本會喺今年第四季加息，事實係點要慢慢睇，日圓就冇乜上落，今早報133。

上證股市仍企得住，兩連升，噚日升9點，慢慢行上嚟，動力係比港股強。港股高開咗70點後就係咁樣，全日高低相差160點，成交千億唔夠，冇力可言，環觀二月至今，彈一日，就跌幾日，想買貨嘅人都係等較低位，短炒要等值搏率，長線投資者要等有入市價值。噚日大家都等噚晚通脹數據，較多人望佢數據唔靚，有得跌就有低位買貨，北水都轉走38億元，離場觀望。大股唔行，係得中聯通（762）升4％最勁，科技股走軟，騰訊（700）跌8元，其他AMXJ全跌。資源股掃高一浸尾段都回軟，其他得啲四、五線股喺度舞來舞去。

美股都係，道指上咗嚟打橫行咗幾個月，前晚升近阻力頂部等通脹數據，如果數據利好就有機會破一破阻力，行多一轉，但大行最後都係睇回落，因為市場過早反映息囗見頂因素。

結果美國一月通脹按年升6.4％，預期6.2％，按月升0.5％，核心通脹按年升5.6％，全較預期為高，通脹回落速度未如理想，或者講，搬龍門後都見落得快，即可能三月同五月都會加25點子。消息公佈後債息變動不大，兩年債息4.6厘，十年債3.75厘。美匯冇力上，最新報103.16。

美股如預期般波幅較大，道指最多跌400點，收窄到跌156點，納指更倒升68點，Tesla升7.5％。投行認為美股處熊市反彈，拜登就話經濟問題已受控，角色問題，寧信前者多少少。

恒指黑期微跌，不過今早金管局再𠄘148億元港元沽盤。