除非美國經濟今年顯著下滑，市場賭下半年減息機會已減少，10年債息升上3.75厘，較早低位3.45厘已升咗0.3厘。美匯103.58、日圓131、歐元1.07匯市變動不大，人民幣則回落到6.82。

外圍股市反覆，美股忽上忽落，道指先跌百點後倒升169點，納指跌71點。美股現水平當然唔吸引，銀行存款都有5厘樓上，理論上係零風險，而投資有風險的標普500間公司盈利率都係5％多少少，唔啱數，除非市場覺得公司盈利能力會上升，或息率會跌，時間會證實美股是否已 overpriced。

ChatGPT熱炒過後，依家暫未可以話係泡沫，只係技術處於發展初期，網上AI回答問題已經唔係新鮮事物，只是要發展到大家期待嘅人工智能仲要一段時間。中美問題繼續僵持，周末又有個汽球被擊落，因呢件事又多咗六間中國公司被列入黑名單，反映中概股表現嘅金龍指數下跌3.66％。

一支大陽燭後接一支大陰燭，港股就咁完成咗反彈，而黑期更因外圍中概股下跌而失守21000點，三個月升市後現在只調整咗半個月，今個月波幅一千點未夠，調整月波幅未夠，好友只有等，最正常嘅調整比率0.382計都要去到19600，仲差1400點，唔算好多，要跌可以好快搞店。

領展（00823）按5供1基準供股，每單位供股價44.2元，集資約188億元。每單位供股價較停牌前收市價62.8元，折讓約29.6%。

舜宇光學（2382）發盈警，去年盈利下跌50至55％。

消息指美國褔特汽車會斥資35億美元，同中國寧德時代在美密歇根州興建鋰電池生產廠，後者將提供主要技術。

美匯上番少少，市場風險胃納下降，比特幣下跌。俄羅斯下月減產，油組表示暫不會提高產量，紐約期油升上79.7美元。