噚日人行進行逆回購4,500億元，維期7日，為市場提供短暫流動資金，國內股市升38點，扭轉近日跌勢並重上10天線上。港股未有跟隨外圍跌勢，低開130點後就抽上，午後愈升愈多，騰訊（700）係升市功臣，大升13蚊，而指數亦都升穿星期二反彈高位21512，收21624，升340點。噚日話等佢開邊，如果跟夜期行，好大機會穿21000，就要試250天線支持，而家借AI概念拉番科技股上去，指數出反彈，就要睇佢可以行幾遠，不過見資金入市意欲薄弱，上面10天同20天線接近21750水平，10天線壓緊落嚟，兩條線都升得穿淡倉就要避一避。

除騰訊外，巴巴（9988）、京東（9618）、友邦（1299）都幫到個市，Google蝦碌事件，令有關股份都先低後高，科技股可以的話，都想同AI扯上關係。ATMXJ中，個個都話自己有相關技術，或者在發展中，所以除咗自己本身外，佢哋下面嘅公司都有資金追捧，好似企鵝嘅微盟（2013）、巴巴嘅阿里健康（241）同擎天軟件（1297）。

畢非德的投資旗艦巴郡於2月3日再出售423.5萬股比亞迪（1211），每股平均作價257.9元，套現約10.92億元。減持後，持股比例由12.26%降至11.87%。

美匯103水平反覆，日圓回軟到131，人民幣6.79。美股一度升逾300點，收市倒跌250點，納指跌120點，Google母公司再跌5％，反而Tesla勁，記得110美元水平話圖表顯示現終極一跌，況且有基本金重新建倉，可買，都係睇165美元，依家完美倍升，完全超出預期。