港股星期一叫做跌近21000點後開始打橫行，指數就冇心跳咁，噚日全日波幅265點，收市跌15點，開市收市同一個價，指數冇得玩，等佢開邊，大眾心態都會等佢出反彈再沽過，有冇咁理想就唔知，出面好多人都買重21700水平收回嘅熊仔，賭佢升唔破呢個位。

科技股係得騰訊（700）頂住，美團（3690）就比抖音加入做外賣仔拖跌6.5％，抖音否認下月一日平台全面上架，可能都只係時間問題，市傳佢今次會同餓了麽合作，餓了麽早前輸比美團，若真同抖音合作，應該有noise。

ChatGPT股份繼續炒，已蔓延到有尋寶感覺，先行嘅商湯同百度唞下氣，就殺出隻知乎（2390），大升4成，佢係中國營運在線內容社區，提供在線解決方案，會較容易運用到ChatGPT同AI功能。巴巴（9988）亦承勢話正研發同類對話機械人，正處內部測試階段，京東（9618）又話會結合ChatGPT嘅方法同技術融合到產品服務中。尾市見另一隻從事內容供應的云想科技（2131）出現突破，佢概念冇知乎咁大，但勝在有PE，NAV又有折讓，可𥄫實。

不過炒還炒，噚日有消息指中國上交所就近日熱炒嘅國內AI股份，要求公司交代解釋其AI嘅實質性同用途，當然希望投資者冷靜。而Google係前晚嘅AI Bard發佈會中，Bard竟然答錯咗其中一條問題，噚晚Google股價即跌8％；百度（9888）ADR都跌咗5％。

納指跌200點，Google帶住一眾大科技股股落。大行對經濟前景存在分岐，都係美股近期忽上忽落，冇方向的原因。美匯曾下試103，最新103.47，其他貨幣變動不大，人民幣6.7942。

外圍恒指跌200點，逼近星期一低位，下面數支持係20800同20300。