恒指50天線噚日已升至250天線，今日將正式上破，港股借勢彈一彈，但力度就唔多夠，最多升300點，收市只剩76點，收21298，成交就縮至剛好千億元。

恒指早前條上升支持喺21600左右，噚日彈一彈上去，未到已掉頭落，個goodbye kiss做咗未，冇人知，條上升支持指標會隨時間淡化，10天線回落中，調整市反彈應該唔會上穿20天線（約21700），有高位開淡，可用呢個位作指蝕。

市場熱話就係AI  concept同Chat GPT，首先就係商湯（020），美股中，Google同蘋果都話要玩埋一份，微軟又話有嘢講，而港股中，百度（9888）一直專注AI同無人駕駛，噚日出消息話其聊天機械人（文心一言）已準備就緒，下月完成測試後就會對外開放，百度股價爆升23元，收市後軟銀披露本月初已減持5000萬股商湯，持股比重降至16.85％。

消息指抖音外賣會於下月一日全國上線，現在三個城市試點中，直接挑戰美團（3690）一哥地位，難怪噚日報導指美團正招聘人手，準備競爭。美團股價噚日逆市跌，抖音加入搶佔市場有一定影響，況且騰訊派出嚟嘅美團股份下月初出籠，市場沽壓增。

醫藥生科股同大市一樣，先反彈後回軟，昨日講係可以留意做定功課，唔使咁快追入，有預設目標，到時板塊跌定轉勢就可以即刻操作到。

鮑威爾講野前，其他儲局官員先助攻放鷹，美股先回，結果鮑Sir言論都冇乜新意，通脹改善中，就業市場勁，不能鬆懈等，有人覺得佢囗氣冇咁鷹，結果美股收市倒升265點，納指升近2％。

美匯103.34，微跌，日圓131。土耳其地震令港囗受損，短暫影響供應，紐約期油升上77美元。

外圍恒指冇跟美股彈，只企係尋日收市水平。