港股守咗三個月嘅上升支持就比個話行錯路嘅氣球篤穿咗，恒指低開逾300點，已經係全日最高位，日中低見21085，收21222，跌438點，日中反彈無力，個市係要調整，就算唔係熱氣球，都有另外借口，只係時間問題，而家個市累跌咗約1500點，可能會進入短期拉力區域，因為下面有一個中線黃金交叉頂住，就係50天線（20109）會係今個星期升穿250天線（20191），應該未致於大跌，早前提過，最牛嘅調整係0.236嘅20800，已經好近，如果以250天牛熊分界線睇，仲有成千點行，但二月成個月波幅應該唔會咁快行完，所以寧願等一等反彈出現，噚日失守嘅上升支持21600水平，已變成咗反彈阻力，如反彈上去做一個goodbye kiss再落過，水位較大，止蝕亦近。

過年後一直流走嘅北水噚日轉淨買20億元，但沽出嘅都仲係大型科企，美團（3690）淨沽13億、快手（1024）3億，同跌5％。好多強勢股都回落，自己一向留意開嘅生科醫療板塊都有壓力，短線係回吐，醫藥板塊係國家重點發展行業，亦可減少對外國藥物嘅倚賴，長線我都係睇好，所以未玩完，呢個板塊仍可以做定功課，而一直有留意的股份包括有康方（9926）、榮昌（9995）、康龍化城（3759）等可以放喺watch list。

美匯繼續反彈，最新報103.64，非美貨幣腳軟，日圓132.8，人民幣6.796。美債息3.65厘，美股連續第二日回吐，納指跌1％，Tesla model Y 加價，另一邊蘋果傳內地減價促銷 iphone，一升一跌。

港股夜期同黑期變動不大，今早黑期報21250，預示高開50點。