等完鮑sir議息結果後，市場解讀係冇早前咁鷹，佢一路開會，個市一路挾，都係納指較強，真係息囗見頂，高增長股同冇盈利股份唔使再殺股值，加上Meta前晚公佈業績係較差，但係就話會回購股份，結果Meta盤後升近20％，所以噚日亞太區時段納期係做好，而道期就回軟。

中港股市反而就進入咗悶局，上證指數升一點唔夠，港股高開後都冇力再上，亦都承接唔到前日反彈勢頭，買上冇力，但又回得唔夠快，都係10天線（22013）咬上落，恒指收21958，跌114點，成交1,400億元，期指收22090仍高水130點，短期走勢難測，如果真係用時間調整，個市真係強到不得了，但個人嚟睇繼續調整機會較大。權重股大多高開低收，反見資金轉去炒市值較細，質素較差股份，十大上升股份，全部升20％以上。

比亞廸（1211）頂住，其他車股微跌，收市後股神公佈再以平均價226元減持比亞廸權益至12.9％。長汽（2333）公佈去年賺近83億元人民幣，按年增23％。

生科醫療股繼續炒，自從阿爺上年第四季開腔講要扶植國內生科公司，一直都叫大家睇住呢個板塊，結果板塊一直反覆升到而家，昨日幾隻板塊末股份好似永泰生物（6978）都大爆，周圍尋寶中，見到隻海普瑞（9989）仲未行，歷史高位20元，而家得三折，睇番公司資料，集團研發同銷售藥物包括抗凝血、抗血栓，獲國家藥監局批准嘅諾肝素注射液在國內同歐洲銷售。同隻永泰生物比，永泰仍在虧損中，海普瑞已經有錢賺，22年中期盈利升50％至5億元人民幣，公司全年盈喜已發，預期市盈率得8倍，其他生科股冇PE可言，此乃第一亮點。第二係集團PB 8.2元人仔，現價折讓三份一，其他生科股PB以幾倍計，而負債總資產比率為57％。以上全部係基本分析，當然點解股價冇反應係為人忽略，或者有內在問題就不清楚，只係睇圖表，250天線喺6.08元從未升穿，如起動可小注一跟，止蝕放喺5.8元，佢唔升穿就睇住先。

英倫銀行同歐央行一同加息50點子，前者因息率已達4厘，唔再展示強硬態度，而後者則表示3月會再加50點子。美股個別發展，道指先跌後收回大部份失地，納指勁，前晚Meta業績後盤後升18％，正本戲時升夠23％，其他大型科技股跟住上，納指勁升384點，唯收市後蘋果，亞馬遜公佈業績遜預期，盤後最多跌4至5％；紐約期油回軟至76美元。

港股夜期回落160點，外圍恒指21800水平。