港股噚日早上窄幅上落，係等美國議息，20天線上到21500，恒指噚日低位21700，未穿前日低位，午後慢慢回升，收市重上22000點同10天線21993之上，前高位22700未升破，唔可能話佢跌完，況且只要噚晚鮑sir有乜令市場有波動性嘅言論，個市隨時裂囗爆上落，所以要判斷個市點行，最少要睇聽日恒指點走。

上證股市先跌後升，高收3284點，升30點，星期一開得高殺落嚟，周線仲開緊陰燭，如果呢兩日再升扭得轉個勢，上證下星期可能仲有得去。

噚日焦點一定係車股，比亞廸（1211）大升15元，完全回補去年8月底股神第一次減持時留下嘅下跌裂囗，中東資金接貨唔知係真假，但威力都唔少，一月比亞廸銷售按年升59％。另外三儍都跟住上，小鵬（9868）同理想（2015）升1成。小鵬收市後就公佈一月新車交付跌按年6成。車配股都有得炒，GM睇好今年銷售，以GM為最大客戶嘅耐世特（1316）升9％。

一如預期聯儲局加息25點子，會後聲明已承認通脹已一定程度上放緩，但都係繼續囗頭鷹，會考慮未來加息幅度和累計的影響，只有提到可能加多兩次（估計係25點子）就停，而今年內減息則唔喺預期中。

美股都好反覆，公佈結果後由跌300點一度擴大到跌500點後即急拉，完全收復失地，納指更倒升230點，Tesla繼續奇妙之旅，上到180美元。

息囗有見頂感覺，美10年債息返到3.4厘，美匯轉弱到101水平，歐元升上1.1，日圓129，而人民幣上到6.722。

外圍恒指承外圍升勢，較昨日香港收市升約200點。