港股噚日高開後頂咗兩個鐘就掉頭向下，一穿10天線即引來程式性沽盤同圖表派炒家追沽，指數全日低見21631，下午大部份時間都喺低位橫行，係最後十五分鐘抽高120點，全跌幅收窄到227點，恒指收21842，期貨仍然高水，北水則繼續流出，淨走63億元。而家港股行緊調整浪，噚日尾市抽一抽難確定是否調整完，最低限度上番十天線企得穩先講。至於個大位上升支持今日會上到21340水平，同二十天線約21400差不多處同一位置。而黃金比率計，調整0.236就喺20800，0.382就見19600。調整會去到邊個位，我冇水晶球，依家調整剛開始定係已經升完都冇人知，只係畀大家幾個位置去參考同判斷。當然個市向緊下就逢反彈開淡較易，若升穿日前高位即平倉。

上證指數跌13點，整個月上升5％。中國一月製造業同非製造業PMI都企得住喺50樓上，較預期好，以一月份假期較多計，數字尚算理想。

美股係預期加25點子同繼續囗頭鷹下，初段表現反覆，其後在去年第四季勞工成本下跌下，憧憬二、三月加多兩次25點子有機會會停，指數中段發力，道指升370點，而納指亦升190點。紐約期油反彈上79美元。

美債息3.5厘，美匯企穩102水平，歐元區去年第四季經濟仍未步入衰退，歐元1.086，日圓130水平上落，人民幣6.7568。