國內股市復市，來個先高後低，上證A股開高衝穿3300點後即刻腳軟，最多升46點，收市只升4點。不過資金繼續流入內地股市，經深股通同滬股通嘅北向資金昨分別淨買入92同94億元人民幣。

港股終於出調整，預計期結日頂多半日都冇，低開後半日跌300，全日就跌619點，最低21992，收22069點，成交放量到2,000億元，北水首日長假回歸，成交例比正常多，北水淨沽出69億元。二月期指仍然高水，今日就到黑期結算。恒指噚日回落後，已完全回補上星期四新年假後嘅上升裂囗，10天線21927，勉強守得住，但係而家開始出調整，大成交出陰燭係麻煩，且沽空數字高達360億元，創近日新高，早前提議減倉，只打游擊，而家可以慢慢部署，初步睇如果升浪未完就應該到上升支持21400左右會頂得住，都失守嘅話就可能會出較深調整，到時要用黃金比率去計，甚至升浪完結都有可能，要每日去求證。

美國國務卿布林肯下月5日訪華，美國又有動作，繼美、日、荷傳落實對華限制出囗半導體設備外，又有官員建議禁止美資買入中國科技股，好似係會談前爭取籌碼一樣，市跌又有較多借囗，騰訊（700）同巴巴（9988）跌7％，嗶哩（9626）跌8％，係中資電訊股叫頂得住。噚日內地公佈新春樓市銷售未如理想下，成個板塊向下，一開就跌，慳番唔使買，或者等成個sector扭轉跌勢先再睇。

公司業績預期中，比亞廸（1211）發盈喜，去年多賺4倍，市場有傳沙地阿美有意洽購股神手上剩餘嘅比亞廸股份，暫未見有回應。國航（753）和東航（670）預期虧損370和360億元。鞍鋼（347）料盈利倒退98％，重鋼（1053）蝕10億人仔。醫藥股中，藥明康德（2359）多賺73％，君實（1877）虧損增至24億元人民幣。