美股上五表現反覆，曾跌100，亦曾升近200點，道指收市升28點，納指續強，再升百點，Tesla再升11％，另一電車股Lucid傳沙地主權基金擬私有化，曾升近一倍，最後升41％。

晶片商Intel料今季會轉虧損，股價插水，成個板塊都有壓力。美日荷三方代表在華盛頓完成談判，研究對華晶片制裁，將美國去年10月採取嘅一啲出口管制措施，擴至涵蓋日本同荷蘭嘅公司。荷蘭將擴大對光刻機巨頭ASML嘅限制，至少防止其出售EUV（極紫外光微影技術）設備畀中國，該設備對生產部分類型嘅先進晶片至關重要。日本光學儀器製造商Nikon都將會面臨類似限制。

至於港股，今日就係期指結算，指數繼續咬住高位行，加上今日國內股市重開，北水回來，估最少都頂埋上半日，大股升到都差不多，靠拉住騰訊（700）、美團（3690）同幾隻中資電訊股上去，資金繼續尋寶，車股差不多係最後一個大板塊起動。市場搵殘價股炒，好似商湯（20）咁，一兩個消息就爆近兩成，內房同物管都唞咗一段時間，碧桂園（2007）上星期已率先攞到新一輸銀行貸款，其他阿爺認為值得幫的都應該會陸續收到緩助，所以板塊若起動可跟炒一轉。

早前熱炒的生科醫療股開始逐隻進入休息期，至於醫療平台股好似阿里健康（241）同平安好醫生（1833），上次炒完後都唞咗個半月，走勢有築底感覺，隨時嚟個回馬槍。

贛鋒鋰業（1772）發盈喜，料去年盈利增長2.4至3.2倍，達180至220億元。

商品期貨中，紐約期油跌失守80美元，跌1.3％，現貨金1928美元，比特幣企係23500美元，市場風險胃納上升。美匯101.92，人民幣6.7569。