兔年第一個交易日，港股承接到假期幾日外圍強勢，紅盤高開高收。恒指一開就22400左右右，收22566點，開得太高，慢慢上，頂到高收，開始有啲吃力咁，早前講過，魚尾位可以去到22500，但會好難玩，噚日裂囗高開到位，下星期一期指結算，會唔會頂到呢日，先收一收，但係都係個句，升勢中要阻佢係難，出面散戶日日都要買熊買put，唔信佢升，佢就日日上，睇番牛熊比例，噚日重貨區22500都殺埋，牛熊街貨比例已近一半半。恒指累升 7800點，要調整唔會跌一日，等佢確認出調整先做都仲有水位。

Tesla業績相對預期好，車股、車配股跟住炒上，比亞廸（1211）升5％，好似忘記咗股神有貨未清咁，三儍蔚、小、理全升10％以上，就連小米（1810）都分到一杯羹，一早話流出佢嘅新能源汽車設計圖，時間啱啱好，股價大升12％。

晶片股做好，中芯（981）升6毫，荷蘭領先光刻機生產商ASML表示，原則上並不同意美國制裁中國晶片業做法，某程度上只會廹中方自行開發，加快中國晶片業嘅發展。

美國經濟數據好，上年第四季GDP增長2.9％，較預期2.6％好，增幅源自庫存增加同政府開支，個人消費則仍下跌。而上月耐用品訂單按月升5.6％，差不多兩年半內最大升幅，美股再升，道指納指各升200點，Tesla升11％，早前提到唔少基金喺110美元水平建倉Tesla，現在已升了三成有多，中概股指數升，部份係追回昨日香港升幅，外圍恒指抽到上22650水平。

美匯101.6，英鎊上到1.24，日圓130，匯市變動不大。