外圍跌，中港股市行自己套路，噚日恒指走勢又同前日一樣，低開跌穿10天線後又上番嚟，上下兩邊咬住唔放，所以話點解開淡起碼要佢肯收穿10天線先諗，10天線開始持平，係似回，但未跌，等佢出方向。上證指數高收3240點，相對強，上周破位後咬得住高位。恒指370點波幅，收21650，跌27點，成交千億元唔夠。大型科技股得騰訊（700）叫做有得升，快手（1024）有股東減持，大跌6％。

外資流入A股市場資金仍然不少，呢個浪國內股市升幅遠比港股少，市場炒憧憬，炒阿爺開關放水，關已開，但放水力度就未如預期，外資未有因而卻步，今個月過咗一半，外資已流入超過1,100億元人民幣，早前提過大行今年嘅投資主題係美股以外嘅資本市場，嗰邊流出，轉向偏低市場，國內市場當然係其一。

中石油（857）同中海油（883）齊發盈喜，預期22年盈利分別上升57％和一倍。

美股前晚急跌後，噚晚仍反覆走軟，理由一大堆，最緊要係企業盈利能否支持高市盈率，如果唔得，就一定要跌。

美匯102，紐約期油80美元，現貨金升1934美元。

至於外圍恒指就升到上21800水平，預示今日會高開200點。

最後祝大家新年進步，股運亨通，身體健康！