港股波幅進一步收窄到260點，全部上午做晒，午後完全冇心跳。恒指全日低位21422，10天線21442，又係頂住穿唔落，左右做人難，造淡就等佢肯收穿10天線先諗；今日開始冇北水了，30號再見。

日本央行上晝開完會，冇比市場驚嚇，繼續買債，日圓即刻回落到131，日股大幅反彈逾600點。日股升，港股都做番好少少，大陸股市冇起跌，收爐feel。恒指收21678，升100點，期指尾市一度挾高到21777。騰訊（700）同網易（9999）獲批遊戲版號，後者大升6.5％，頂住個科指。

美國12月生產物價指數按年升6.2％，低於預期6.8％，通脹控制逐步見成果。美國大企業開始有新一輪裁員潮，包括微軟同亞馬遜，一、兩個月後就會反映係失業率中，到時消費跌，通脹落，但衰退潛在性升，到時就要睇聯儲局會否果敢行動。

美股回落逾600點，理由都係舊調重彈，只要聯儲局唔敢加息，就表示經濟活動放慢得比預期快，較強嘅納指都要跌1.3％，中概股跟跌，外圍恒指預示低開200點，又再有機會試10天線。

美匯102.18，日本央行冇放鷹，日圓回一回，好快又重回128，應該仲未升完，下一個位126.36。