港股都開始準備放假，過年前最後三日市，聽日開始冇北水，成交減至1,270億元，冇北水下，呢三日成交都應該慢慢少落嚟，而近日都見國內資金假期前開始減持，因要停成個星期，慎防假期內港股或外圍有乜嘢事，走都走唔到。

恒指低開後又係幾百點上落，低位較前日低，收市又跌少咗手。個市冇力買上，或者資金未願意買上，但又咬住唔跌，散戶等調整先肯出手，或者開淡搏跌，但就喺高位橫行兩個星期都唔落，叻嘅只可以食到佢200點。而家指數十天線都未跌穿，開淡搏佢跌，止蝕要擺到係21947，成本又太大。

藍籌股逐隻腳軟，係靠隻巴巴（9988）頂住，生科股全線回落，板塊調整剛開始，又有抽水，繼藥明後（2269）配股失守配股價後，亞盛醫藥（6885）以先舊後新折讓7至10％配售2250萬股，所以板塊無須急撈底。

小鵬汽車（9868）噚日公佈旗下部份汽車減價2至3.6萬元人民幣，ADR股價跌至約36.5港元。

今日日本央行又會開例會，要關注黑田會後有冇發言，市場最驚日就係日本要加息，就算囗頭鷹都麻煩。

美股價後復市，銀行股業績參差，大摩稍好於預期，而高盛季度盈利按年跌69％，股價跌6％，美銀指一月份美股基金經理對美股配置大幅下降，道指跌400點，納指則頂得住冇起跌，Tesla升近8％至131美元，中概股指數跌逾3％。

美匯102.39，主要非美貨幣續強，人民幣回落至6.78，紐約期油81美元。