港股承接外圍強勢下高開未到22000點就掉頭向下，低見21572，收番21746，成交1,400億元，上證上星期穿位後繼續上，但係就帶唔起港股，雖然恒指仍在升市中，但係大成交唔行，最驚係魚尾多骨，佢唔轉勢淡難做，但係買貨風險相對大，所以話要入場就一定要計數，冇得留戀。藍籌股大多抽高回，騰訊（700）中間位收，微跌，美團（3690）跌3.2％，港交所（388）跌穿10天線，巴巴（9988）、京東（9618）開陰燭，強勢股冇力，市寛麻麻，只係內銀同舜宇（2382）上升，拉上補下，指數勉強守得住。

生科醫療股上周四、五呈強，炒到板塊龍尾股，噚日再爆多一下煙花，回吐都快，部份升幅收窄，部份更倒跌。上年年中後，大市未見底，醫藥股已先行，升幅都可觀，佢都應該先過大市調整。收市後有藥明股東減持消息，生科股都要唞下氣。依家就要睇吓其他未行板塊能否接力上。

藥明生物（2269）大股東WuXi Biologics Holdings Ltd擬以每股70元至71.5元，配售5,600萬股，套現39.2億至40.04億元。

美股價期休市，歐洲股市靠穩，美匯102.15，日圓128.27，英鎊1.22，人民幣6.7437。

紐約期油79美元，虛擬貨幣繼續做好，比特幣升至21200美元。

恒指黑期21650，預示跌約100點。