港股噚日開高後又係唔去，期間一度倒跌過200點，上面就頂住响11月起每個浪頂拉上去嘅阻力，高低位計恒指曾呈現穿頭破腳，但又收番上去21514點，今個星期夜期晚晚都升，到日間高開又跌番落去，好似每朝都派一派咁，每日都有大成交，但係就開高上唔到，又死頂住唔落，窄幅上落市，但係噚日跌個下急且快，可以比個警惕大家，當狼來了又好，先制定萬一真跌時有咩策略。

騰訊（700）逆市跌2.6％，巴巴（9988）都跌，前者喺高位真係做咗支穿頭破腳，成個浪升咗8成有多，第一個支持位先睇345元。

比亞廸（1211）前兩日都午後突然掃高，真係有春江鴨咁，噚日高開一下就升到上236.8，剛剛好就喺250天線，收228.4。市場解讀係比亞廸進軍印度電動車市場，預料到2030年市場佔有率達四成，不過印度唔係一個好倚賴外資企業嘅國家，而且以中印關係，能否做到預期成效又係另一問題。

美國上月CPI按年升6.5％，核心CPI升5.7％，全符合預期，汽油燃油價格跌幅最大，亦可反映美國通脹已由高位回落，當然市場對通脹回落速度各有分歧，暫時預期下月加息幅度為25點子。

數據公佈後美股反覆做好，道指納指同升0.64％，而美股今晚開始進入業績期，市場焦點又重回企業盈利能力。

美10債息3.43厘，美匯102，歐元1.0856，日圓升穿130，人民幣6.7402。商品期貨做好，現貨金升穿1900美元，紐約期油78美元，比特幣急升9％，重上19000美元。