2023年01月28日

港股噚日續喺高位反覆,上唔到,跌唔落,200點內上落悶足全日,成交1,300億元,靜市中算合格。上證都係冇方向,微跌6點。指數冇得玩,大股窄幅上落,教育、內房同飲食板塊有多少沽壓。中午過後一眾車股突然炒上,消息欠奉,去年底結束的汽車補貼未有再延長,比亞廸(1211)再被股神減持後先跌後回升,倒升3%收市。

恒指由2021年高位31183拉落嚟嘅下降阻力正處於21600水平,指數升到上嚟就頂住,現水平要估有難度同唔值搏,核心貨底未轉勢可以留,新加倉就只係可以打游擊,贏輸都要計數,就係要慎防佢突然一下調整。

中港市場可能升得多,又近假期,散戶應該持現貨唔多,仲成日都搏佢跌,反而見歐洲資金可能係最大持份者。鮑威爾噚晚又會有嘢講,問同答都係個幾條問題,佢嘅答案都係預計到,強硬加息,高息率維持一段時間,要等通脹回落等等,總之一定唔會釋放利好消息令投資市場抗奮,制造財富令通脹難控。

繼前晚大摩唱淡美國經濟後,亦有投資報告建議今年嘅投資主題是美股以外,即是其他世界各地市場,美股除外,認為美國嘅緊縮、縮表,同企業高PE都係美股嘅障礙。近一星期資金開始流出標普同納指ETF,而轉為流入債券ETF,就係睇住美息今年見頂,即債價已接近底部。

日本通脹開始上到4厘,日本央行之黑田已有囗風話日本可能加息,呢個有機會會係今年其中一個黑天鵝,令全球套息活動來一個大轉向,日圓升,拆倉出現,所以要密切留意日本央行動態同日本通脹走向。

環球經濟隱憂拖累手機銷售,舜宇(2382)上月手機鏡頭出貨量按年下跌近4成,按月都要跌2成。

雅居樂(3383)2.25元先舊後新配售2.2億股。

結果鮑威爾冇嘢講,美股做好,納指三連升,唯市場仍不相信美股已跌完。世銀預期今年歐美經濟近乎零增長,中國有4.7%,亦可解釋資金東走原因。現貨金1877美元,紐約期油75美元。美匯企係103水平,日本央行未有動作,日圓132,人民幣6.78。

外圍股市做好,外圍恒指衝上21550,預示今日高開200點。