港股承接外圍股市上升同中概股做好下，再升400點，成交1,560億元，大市高開後頂得住高位橫行，繼兩日陰燭後，開番支細陽燭，配合10天線迫近250天線，勢頭尚可。若果噚日再開陰燭，就好易形成一個島形頂，一個裂囗低開就出調整，當然個市累積升幅唔少，未來出調機率仍大，圖表指示參考預計走勢。大市走強另一因素係人民幣走強，亞洲市時段美元兌日圓已回落到6.76，上證股市亦隨着做好。

螞蟻唔再由一人話事後，巴巴（9988）股價成最大得益者，多間大行將佢列入確信買入名單，股價單日升8.8%，系內股份包括阿里健康（241）同高鑫零售（6808）都受追捧。美團（3690）就繼續受壓，高開低收，倒跌2.1元，騰訊（700）減持佢嘅股份三月先出爐，呢段時間內都會受陰影影響。

股神畢非德再度減持比亞迪（1211）。據聯交所的股權披露顯示，股神嘅投資旗艦巴郡於1月3日出售105.8萬股比亞迪H股，持股比例降至13.97%。每股平均作價191.44元，套現約2億元。

美國今個星期四會公佈12月份的CPI數據，市場大行對美國陷入衰退預期仍有分歧，大摩策略師認為美股面臨跌幅遠超好多悲觀人士預期，而相反美股盈利預期則過高。

美股先升後回軟，道指倒跌112點，零售股下跌，Tesla回升6%，納指升幅收窄，仍有66點進賬。美匯進一步回落到102.93，人民幣6.7746，歐元彈上1.075，日圓132。