2023年01月29日

聯儲局會議紀錄繼續放鷹,但係睇債息同美匯走勢,市場傾向唔信佢可以加到去個鷹王講到5.4厘,我都係估佢囗講係鷹,因為佢要㩒通脹,想你驚,等你減少消費,今晚美國會有大非農數據,呢一、兩個月開始見有大企業裁員,如果就業數據開始轉差,預期加息空間就會減少,要睇多一、兩個月數據先確認到。

港股繼續上,借中概股強勢高開21300,高見21396就有壓力,成交放量至1,740億元,高位冇出上影線,出咗支陰燭,國內股市做好下都行唔到高收,係開始有壓力,但轉勢訊號未明顯,不過沽空金額就有280億元,創近期新高。仲有兩星期就過年,21000樓上減持輕倉過年舒服好多,短炒肯計數就無妨。恒指連續兩日出裂囗,有啲虛耗性,要補一個要落番20800,大位就睇番250天線20362,要升冇理由得而復失。

幾大科網股都係高位開陰燭,應該都要唞下氣,回得最少係快手(1024),做到粒十字星。騰訊(700)噚日除淨派美團(3690)當股息,3月24號派送,後者追落後升咗5%,但出咗枝上杆,182至185元不宜失守。二三線股份有部份開始跟得上,如大市只調整鞏固,可開始下一輪尋寶。

內房物管板塊先跌後回穩,收市後又到住建部部長出來穩定軍心,表示對今年樓市回穩很有信心,以利率同首付政策支持購買首套住房。

微盟集團(2013)擬以每股配售價6.39元至6.53元,配售2.48億股,集資15.85億至16.19億元。

噚日有微信女喺通訊軟件派隻信索信達(3680),生人勿近也。

美國噚晚公佈嘅小非農職位較預期強勁,就業市場未逆轉,三大指數跌逾1%,反而中概股指數仲有得上,巴巴(9988)折合約為103港元,外圍恒指最新為21250,較噚日港股收市約升200點。

美匯升上105.13,日圓133.4,歐元1.0522,人民幣6.887。