噚日話港股要繼續上，就快啲升穿250天線，推上一個橫行區，果然聽話，一開已破位上，1,500億成交下愈升愈有，指數高收20793，升673點。中資股承接ADR升勢，港股時段升幅進一步擴大，焦點股份係嗶哩（9626）同巴巴（9988），前者跨年晚會直播觀看人數破紀錄，升9%，巴巴則受重慶螞蟻可增資刺激下抽升近8元，上破250天線，最近阻力係98元。騰訊（700）今日除淨派美團，上到361元，兩個半月升咗8成。

個市氣勢仍盛，二線股已開始有人留意，好似閱文（772）同幾隻線上醫療股咁，股仔未見接力上，喺內房物管有政策扶持下就跟到大市升。現時走勢冇得估頂，只可等佢出訊號，除咗噚日話跌穿通道支持外，如見到高位成交放量都要小心。

Tesla 生意差致股價再跌，外面有唔少基金已於120美元開始建倉，賭嘅係Elon Musk鳥倦知還。本地車股噚日都跟唔到大市升，比佢拖住。醫療生科繼續係最亮麗板塊，海吉亞（6078）承勢配股抽水，穩守配股價上，強勢板塊，同早前內房股一批就穿係兩回事。康龍（3759）再升5%到59元，有講過留意嘅而又未開車嘅有微創機械人（2252）同信達生物（1801），如果起動可跟一跟。蘋果因預期銷售跌，要零件供應商減少供應同壓價，舜宇（2382）作為喺香港上市最大嘅蘋果供應商，逆市要跌一成。唔只蘋果，中國11月手機出貨量下跌34%，頭十個月減少23%，環球預期經濟衰退，用家換手機意欲會減少，情況最少延續至今年年中。

內房民企時代中國（1233）指暫未能支付今明兩年到期的債息，此兩批債權人有權要求加快還款。

美股初段橫行，其後抽升200點，等待聯儲局會議紀錄，結果會議紀錄如預期，高息率會維持一段時間，以防市場過份炒作，拖慢通脹回落，公佈後美股升幅收窄。紐約期油跌5%，去到73美元。

中概股喺ADR表現神勇，金龍指數升8%，巴巴升到折合港元102元，恒指夜期再升400點，而外圍恒指為21200點，預示高開400點。