中港股市新一年第一個交易日都好戲劇性，上證先跌16點，倒升27點收市，國內股市升開就要行，唔好返轉頭，上面第一個阻力係3190左右。港股波幅仲勁，低開後最多跌480點，穿一穿通道底，10點後即刻抽上，中午前已倒升，高低位相差900點，個市咁大上落，成交都唔算多，只得1,200億元，不過沽空就相對唔多。既然守得住通道底即彈，就睇住呢條線做人，咁下一次一收穿就要開始減倉避一避，呢個係一個回吐時嘅防守策略。相反個市可以一跌就彈，散戶唔重倉都係一個因素，其實上到18000點好多人都唔信仲有得上，愈升就愈吾會買，而家收得上20000點上，係好嘅就升穿250天線20380，把橫行區推高一格等過年。

個別板塊中，一直有提開的醫藥生科同醫療股份繼續做好，美團（3690）有騰訊（700）除息派送陰影下，一度跌5%，埋單倒升1%，反而騰訊仲勁，快過下市上到250天線。

周末有傳好多房企都仍未能完全償還短期債務，內房物管板塊昨日一開都下跌5至8%不等，其後內地股市內房股反彈，本港相關股份跟住倒升，市場好似繼續憧憬國家會繼續扶持。噚晚人民銀行廣州分行即表示，近期指導轄內金融機構為省內優質房企辦理內保外貸業務，融資規模超過28億元人民幣，用於歸還房企到期嘅境外貸款，緩解企業境外融資壓力；接下來將推動內保外貸業務進一步擴容。

美股同港股開局剛相反，先升後跌，兩大巨企拖住個市向下，蘋果預期手機需求下跌，要求供應商減少零件供應，跌3.7%。而Tesla上季交付都係差過預期，大跌12%，納指跌80點，道指跌跌幅收窄至10點。

10年債息回到3.75厘，美匯升上104.69，日圓稍回至13162，英鎊失守1.2，人民幣6.92。