港股去年埋單都喺20000點之下，今年係點，真係要摸住石頭過河，國內疫情已爆到冇數字可以公佈，朋友番禺嘅廠房有7成人都中咗招，大部份都係輕症為主，但點都要停一停，相信其他地區都係一樣，碰啱過年前後都會停工，但假期中人囗流動又會觸發另一輪爆發，港股炒開關炒到20000點，但上證股市就唔係升咁多，係咪反映國內投資者至少短期不致太樂觀，兩地投資氣氛有反差。美國PCAOB暫時對中概股放行，多隻已申請到港市嘅中概股都暫時停止到港市計劃，雙重上市其實百利而無一害，係咪有咩因素外人未知。另外外圍經濟究竟係通脹落得快定係衰退來得急，年結後美股又好快進入業績期，港股公司都會係新年後開始出企業盈利預告，以往阿爺過年前會輕輕收水，都有機會左右大市。

上周六，中國公佈12月製造業和非製造業PMI分別下跌至47同41.6，均遜預期，分別連跌4同7個月，上月國家受疫情影響，新訂單減少，成個服務業商業活動包括運輸同消費跌幅都相當顯著。

富途香港上市被叫停，中證監上週五高調指富途同老虎證券近幾年喺未經批准下喺國內集進行違法違規業務，兩者都即刻表示會按監管要求配合相應整改工作。而兩者在上週五美股ADR時段分別下挫31同28%，亦拖累中概股指數下跌1%。

華泰證券（6886）擬AH股共同以十供三形式集資280億元人民幣，以股數計AH股供比例為8比3。

蔚來（9866）、理想（2015）12月新車交付接近16萬台同2萬台，按年升5成，而前者第四季同全年交付按年則上升60同34%。比亞廸（1211）就喺元旦日起加價2,000至6,000元人民幣不等。

美股喺22年最後一個交易日，三大指數一度跌逾1%，收市前跌幅收窄至0.2%，整個2022年，納指跌33%為三大指數表現最差，Tesla逆市升1%。美債息3.9厘，美匯103.23，日圓進一步升上131，人民幣亦係假期前轉強，美元兌人民幣回到6.9255。紐約期油升穿80美元。