2023年01月29日

今年尾二嘅一個交易日,港股跟住外圍低開,最低見19540,啱啱好守得住10天線上頂住,反彈上19741點高收,暫時向上勢頭未變,假期前成交進一步減至900億元,今日年結大多人預期都係靜市,過往兩年最後嗰一日半市都玩挾淡,睇下今日會唔會又殺你一個措手不及。

恒指年結前守得到喺10天線19500,20天線19360,同上升通道底部19400上面,通道底已慢慢上移,依家都非常接近,好易失守,最好快啲抽上遠離通道底部。噚日大市都係靠企鵝騰訊(700)頂住,阿爺再批新遊戲版號,係得佢能逆市升近3%,其他手遊股高開後全部倒跌,醫療生科就係另一個亮麗板塊,早前喺45、6元提及要留意的康龍(3759)連升兩日,噚日逆市升逾7%,而噚日開始起動嘅亦見有信達(1801)、微創機械人(2252),不過似終都係長假前夕,不適宜太進取。

年結前,美股回升,道指升345點,Tesla果然下跌出大成交後就反彈,升8%,暫時仍以135美元為短期反彈目標。Tesla連同其他大科技股蘋果同Meta,帶動納指升2.6%,中概股指數反彈2.8%。國內雖然開關,但憂慮疫情未能令油需求即時回升,紐約期油一度跌近76.8 美元,最新為78.4美元。美匯103.71,歐元1.0667,日圓132.6,人民幣6.977。

最後祝大家大除夕愉快,新年進步,股運亨通。