2023年01月28日

阿爺開關,香港嘅防疫措施繼續寛鬆,但係前晚開始最多人講嘅唔係通關,亦唔係通關受惠股,而係你開關,人地就封你關,當然香港人最心痛嘅係去日本只可以去三個地方,事出突然,好多人旅遊計劃受影響,除日本外亦有幾個國家話會暫時限制來往中國航班數目,大家都睇住國內疫情而制定對策,當然一定有少少係政治因素。

講番個市,恒指高開後搶上20000點上,係8月底後首次,相信係期結同年結關係,高位有多少壓力,收市為19899,都升305點,成交1,200億元,期指喺現貨收市後再升上20000點上,高水125點。今日同明日分別係期指同黑期結算,如果企得住,一月頭兩星期仲有得憧憬下,先睇住250天線20500左右,過年前可能內地會收一收水,個市就會靜落嚟。但如果結算後佢向下調,先望住通道底19400支持。

Tesla股價連日下挫,呢邊嘅電動車股都冇運行,三儍跌7至10%不等,Elon Musk出到囗講話吾會再減持,可能佢講野開始冇人信,股價都繼續跌,由幾個月前300美元到前晚110美元,跌幅6成有多,近幾日跌勢中成交開始放大,有啲短期見底feel,咁多空倉有咩風吹草動一齊平倉下,威力都幾大,反彈第一仲阻力可先睇住250週線136美元;如果Tesla反彈,香港呢邊車股都應可跟炒一轉。

美股三大指數早段升一升後,就掉頭又插,全跌逾1%,標普500失守3800點,Tesla逆市上升,但其他權重股都下跌,中概股指數跌3.8%,拖累夜期同外圍恒指跌落19600水平。

美債息升上3.9厘,美匯104.25,日圓回到134,相反商品貨幣受追捧,澳、紐元同升逾1%。