2023年01月27日

港股前日悶咗一日,當上升通道底部上到18800水平時,噚日又喺國內政策推動下,個市一開已經上番10天線上,上證指數午後由升轉跌都阻唔到恒指升勢,以差唔多全日19675高位收,升517點,成交就只得930億元,升市多番少少,全日沽空都係處於低水平,反映空軍係個市相對高水平位置都未敢大開淡倉。

前日阿爺喺國常會話要谷內需同支持平台經濟發展,係真支持定係囗講唔知,不過政策面就應該唔會再打壓,幾大平台股份升3至6%不等。至於內房,中證監同人行一齊開聲容許房企「借殼」已上市公司同支持重組,大摩又指行業評級吸引,不過噚日板塊升勢未能貫徹到最後,可能係驚佢哋股價一升又向市場抽水。至於開關復常,噚日都有傳下月3號國內入境會改為0+3,當然又係冇得證實,而家阿爺開始改變疫情公佈策略,應該知道如果再封落去,經濟都唔頂得幾耐,開關係會恢復經濟增長,但疫情一定會幾何級上升,期間都會出現經濟活動短期停止的機會,呢個無奈係要接受。好簡單如即將過年嘅春運後,亦會迎來另一個高峯,疫情真實數字不會公佈,不過就會流傳邊度有大爆發嘅傳聞,間歇性都會影響投資氣氛。

美國第三季GDP按季增長3.2%,高過預期,一個數據,顯示經濟活動仍可,亦延續政策收縮嘅可能性,道指最多跌800點,收市減半至350點,納指跌2.3%,Tesla繼續散,要減價促銷,跌8%。半導體股美光業績遜預期,又要裁員,成個板塊都拖累。

外圍恒指又落番去19350水平,預示低開約350點。

最後祝大家聖誕快樂,新年進步!