今日係冬至，大家都忙做節，首先祝大家節日快樂，而港股亦都開始進入節日氣氛，半日成交400億，全日只得700億元，高低波幅唔到200點，個市靜到唔識行咁，恒指全日收19132點，連上證股市跌咗落嚟後都彈唔到，上證指數前日跌穿50天線3086後，噚日彈番上去都衝唔過。

年底前全球股市都係反覆偏軟，美國納指5連跌，其中Tesla一個月內由高位近200美元跌到137美元。Elon Musk 今次買Twitter 可能真係買出事，除咗自己要減持Tesla籌錢外，市場更有傳佢將一啲股份抵押出去套現，而斬倉位就喺120至150美元，所以見呢兩日跌勢係加快咗，另一方面亦有傳佢正積極搵中東資金救亡，照圖睇，佢股價上唔到去160至165美元都未言安穩。希望佢今次搵人接任Twitter  CEO 位置，自己真係可以專心搞番好Tesla。Tesla唔妥當，都影響到周邊行業包括鋰電池同車配生意。

美股反彈，主要係幾大公司如Nike同FedEx 業績都勝預期，稍為緩和衰退嘅擔憂，而有消息指聯儲局就快換屆，幾個鷹派行長會失去投票權，市場都憧憬加息幅度可能冇咁大，道指反彈526點，納指162點。 中概股指數回升3%，帶動外圍恒指升上19400水平。

美十年債息3.68厘，美匯反彈上103.9，日圓132，人民幣又廹近7算，最新報6.9871。油庫存減少，紐約期油微升上78.5美元。