2023年01月29日

西方央行放鷹後,市場叫做開始消化咗之際,估唔到日本都開始囗頭轉鷹,其實以日本經濟來講,能否轉鷹係問題,只不過冇諗過日本會變,殺市場一個措手不及。

日本從來冇介意日圓下跌,目前日本通脹唔高,只係外圍不惜犧牲經濟去打通脹,日本相對不利,日本銀行行長黑田下年中前都卸任,離職前都要放咗一個小型炸彈,應該睇到個問題所在。日本政策利率維持係負0.1%不變,但係央行會調整10年國債收益目標,由0.25%去到0.5%,希望可以改善市場孳息曲線,亦講到明如果美國經濟下滑唔影響到日本經濟唔話,會準備下年加息。佢嘅言論一出後,日本 10年債息升20.5基點至0.455厘,係2015年來最高。消息一出,日股急挫逾600點,而日圓日中就由137抽上132.43。

日圓急抽,觸發起環球市場一個震盪,市場憂慮以往接近零息借入弱勢日圓嘅時光不再,炒家輸息唔緊要,輸差價就入肉,所以一定會引發拆倉潮,沽出風險資產,還日圓債,力度幾強就要睇拆倉幅度有幾大。

港股除受日圓急升拖累外,國內股市走軟亦都幫手踩多一腳,兩個支持位,19200失守,但係18800就守到,噚日低見18885點,20天線18869啱啱好頂得住,收番上19094,成交963億,沽空比率仍處於低水平。恒指仍處於上升通道中,短期係做緊調整,並未轉勢,至於日圓上升的影響,都要睇多幾日全球股市反應,若港股失守18800,係可以部份離一離場避避,今年只得番6個交易日,下年仲有成年玩。

噚日又多兩隻內房抽水,分別係雅居樂(3383)同旭輝(884)全部先舊後新,好等錢使,分別集資6億和10億元,後者收市失守配股價1.14元。板塊抽水活動會陸續有來,有人肯接,公司就有新水頂住。

美股交易時段日圓繼續升值,美元兌日圓跌至131.9,人民幣6.9581,而美匯就回落到103.6。美股繼續反覆,道指由跌轉升,納指冇起跌,Tesla再跌8%,神話不再了。