2023年02月9日

港股噚日開市初段突然抽高300幾點,理由不明所以,唯一見到係中央剛舉行嘅工作會議有較多文字放喺新經濟身上,其他都係谷內需、保交樓等一般字眼,市場一下子預期國內對新經濟行業可能會較寬鬆,ATMXJ早段一齊爆上。國內股市急挫近2%,基本上大部份板塊都回,尤其係生物醫藥股跌得最多,港股都由高位跟住回,倒跌收市。

睇番工作會議中係新經濟字眼中,遊戲同網上金融隻字不提,主要重點放喺農村電商、直播電商等,尤其以農村覆蓋範圍較大,農村概念就以快手(1024)最多,電商則有巴巴(9988)同京東(9618)。而美團(3690)則受惠無人配送,智慧餐廳同旅遊,早段一度升11元,無奈跟大市回。

恒指先升後跌,高位開支長針回落低收,繼續高位橫行,1000點內落,近兩周沽空金額不多,淡友未敢加力,好友見升左咁多,亦樂見現水平年結。

信義玻璃(868)預期今年純利下跌55至65%。

美股連日下跌未見起色,道指一度向上,收市仍要跌162點,納指跌1.49%。Meta被指違反歐盟壟斷,跌4%。大摩加入唱淡美股行列,預期美企下年盈利倒退幅度,同08年金融海嘯看齊,標普500最多可跌20%。外圍恒指19250,較昨日收市跌70點。

美10年債息3.60厘,美匯104.29,日圓137,人民幣6.985。紐約期油75.88美元。