環球金融經過一個繁忙嘅一周，有通脹數據，又有各地央行議息，一般加息幅度符預期，但係大多央行言論都較鷹，市場有壓力，要驚加息，又要驚衰退，今年早咗嚟嘅christmas  rally，亦係聖誕前進入調整。美國12月PMI繼續遜預期，美銀都表明憂慮聯儲局又一次政策失誤會導致美國經濟硬着陸。大行預期各地衰退機率，歐洲成數較美國為高，美股今年好波動，都已反映咗大部份息囗上升因素，但明年企業盈利能力成疑，特別係歐洲有業務嘅就更加危，依家大行預期美企下年上半年平均每股盈利最少下跌一成。

上星期五美股四巫結算日，道指最多跌547點，收市跌少一半，下跌281點，開始考驗32500水平支持。納指都跌100點，已中咗10月底到依家嘅上升支持，希望守得住。Meta逆市升，因為摩通調升佢投資評級至增持。中概股指數企得住，上周PCAOB表示已攞到需要嘅文件，下年會繼續定期做Audit，有得繼續，即係今次過咗關而佢地哋玩法係要連續三年過關就冇事，即係中概股退市可以拖多三年，怪不得巴巴（9988）早前話延後雙邊主要上市，吉利（175）又高調話把「極氪」到美上市。

港股上周出現回吐，但幅度有限，日線圖中，指數頂住在上年6月延伸落嚟嘅下降阻力之上，現為19100左右，剛好上星期五低位係19130，又回升上接近10天線19467收，黑期直至上星期六早上收市時下跌145點到19330水平。除非外圍或國內股市出啲乜嘢事，今個月港股只剩低8個交易日，好大機會喺高位橫行，等通道底上來，到時到底回升，或跌穿失守，對下年一月都有指標作用，而目前最大支持位都係18400水平。

據港交所權益披露資料顯示，騰訊（700）喺今個月13日遭大股東Naspers減持99.3萬股，每股平均價320.028元，套現約3.18億元。

又多一隻內房抽水，合景泰富集團（1813）以先舊後新方式配售2.35億股股份，佔擴大後股本約6.87%；每股配售價2.01元，較上周五收市價2.36元折讓14.83%。

美債息升上3.56厘，美匯104.84，人民幣6.9774。衰退憂慮拖累油價，紐約期油跌2.4%至74.29美元。虛擬貨幣再有新負面新聞，繼早前FTX爆煲事件後，今次係法國一會計師事務所暫停向所有加密貨幣客戶核數，而幣安亦都係其一，無疑對虛擬貨幣係有壓力，比特幣下跌，三日已累跌咗1,600美元。