鮑Sir繼續囗頭鷹，但係美債息同美匯都唔升，大家都知道咩事，亞洲區美股期貨就全日牛皮，應該等噚晚先見真章。至於中國，國務院係前晚發表2022至2035年國家經濟發展方針，內容好似講咗好多嘢，其實都冇新嘢，又冇投放金額資料，都係話要谷經濟，撐內需，發展新能源等，汽車業上次嘅優惠會喺年底到期，可能到時又會延續，其他再有大型資本投放可能性唔大。而內房字眼中，都係保交樓，但繼續房住不炒。

上星期內地指話今個星期開嘅工作會議會提到救內房政策，結果上星期五成個板塊炒到high high，跟住疫情關係，會議延遲，而成個板塊不斷有股份出嚟抽水，前幾日旭輝（884）先話會接受投標出售旗下物管旭輝永升（1995），噚日就以4.85配售9,000萬股旭輝永升，成個板塊開市初段就插，其後慢慢收復，收市板塊大部份股份只係微跌，究竟真係有資金覺得值得買定係托番上方便再有公司要抽水，自有分曉。

港股跟外圍走軟，好似預示到美股尋噚晚會跌咁，美國今晚12期貨期權結算。恒指噚日最多跌440點，收市跌300點，成交千億元，年尾開始少咗，沽空亦少。恒指收19369，輕微跌穿10天線19390，年尾前開始做上落市，下面睇19200同上星期低位18800係短線初步支持。

美國上市公司會計監督委員會（PCAOB）表示，其檢查員已經能夠充分審查呢啲公司嘅審計文件，亦已經確定在歷史上首次獲得審查中國公司嘅全面訪問權限。檢查員同埋調查人員能夠查看完整而又包含所有訊息嘅審計資料，以及PCAOB需要嘅資料，呢個意味中概股喺美國退市嘅機會下降。

高盛集團將中國今年國內生產總值（GDP）增速預期，從3%下調至2.6%；並將今年第四季增長預測，由之前嘅3%下調至1.7%。不過高盛將中國明年GDP增長預測由4.5%上調至5.2%。中國重新開放嘅初期階段可能會給經濟帶來負面影響，就目前而言，已睇到11月和12月嘅增長勢頭減弱，但消費和服務業活動之後可能會得到提振。

歐央行和英倫銀行都加息50點子，都表示會繼續加息抗通脹，美國11月工業生產和零售銷售都較預期弱，聯儲局嘅鷹派言論顯示打擊通脹比衰退擔憂更大，但市場就兩方面都驚，通脹係會落，但衰退影響暫未估計到，仲驚聯儲局又一次形勢錯判，市場最驚不確定性，有懷疑就揸現金，美股就立即反映市場情緒，道指下跌764點，納指跌幅3.7%，科技，零售股捱沽，Elon Musk再減持Tesla。

美10年債息3.45厘，冇明顯抽升，美匯升上104.3，英鎊1.2182，澳元0.6702，而人民幣又再次廹近7算，最新報6,9978。