2023年02月9日

噚日個市成交明顯少咗,半日700億,全日1,250億元,大家都等噚晚嘅通脹數據,跟住兩日就聯儲局議息,亦都想睇吓阿鮑sir點演繹個通脹數據,對未來息囗走向有咩睇法。市場預期上月CPI係按年升7.3%,而睇番上月油價,美國內部二手車價同樓價都係跌,淨落嚟就睇內銷,糧食同交通價格指數係咪回落。直至前晚利率期貨顯示今月加50點子機率係75%,而下年2月加25同50點子機率係各一半。

噚日港府再放疫情寛鬆措施,包括取消安心出行同黃碼,只用疫苗通行證,曾刺激指數最高見19707,大股唔行,寛鬆下本地股炒起,莎莎(178)升13%,冇咗黃碼,到港人士做咗核酸測試冇事後可以自由活動,飲食同旅遊,酒店股受追捧,冇咗呢個消息,噚日市況都幾沉悶,只係下晝三點三有消息指為應對外國對華晶片限制,會釋出萬億元人民幣扶持晶片業,兩隻晶片股華虹(1347)同中芯(981)一個鐘上升17同10%。

股神畢非德嘅投資旗艦巴郡喺12月8日再喺場內出售比亞迪(1211)喺132.95萬股H股,每股平均作價約201.34元,套現約2.68億元。減持後,巴郡於比亞迪持股由15.07%降至14.95%。

美國上月CPI揭盅,結果按年升7.1%,核心升6%,全部都比預期低,通脹壓力進一步舒緩下,美股開市後急升,道指最多升700點,納指升400點,其後高位急速回落,前者只升100點,納指升幅由3.8%縮至1%,中概股指數反彈1.7%。繼大摩、高盛後,摩通都建議明年要減持股票投資比重。

通脹數字公佈後,美十年息低見3.41厘,最新為3.49厘,利率期貨顯示明年2月只加25點子機率上升。美匯跌至103.6,歐元1.063,日圓135.5,人民幣6.9654。