2023年01月29日

個市低位計,個半月彈咗5000點上嚟,上星期開始,愈來愈多股份出嚟抽水,亦見有股東趁反彈減持,先有九毛九(9922)主度沽出股份予機構性投資者,軟庫沽商湯(020),上星期五一眾內房物管股抽升,結果新城(1030)先舊後新3.5元配股,跌穿配股價,阿爺政策救內房,企業趁股價高預咗抽水,阿爺允許也。最唔好就係碧服主席私人減持7%,比人有趁股價升自肥感覺,又係配股價一開就跌破。旭輝(884)都係,話以招標形式放售其物管旭輝永升(1995)23%,後者急跌12%,呢個係最差嘅減持方法,究竟係已經市場試過盤冇反應,或者阿媽冇能力抽水,被迫出此下策,噚日成個板塊都有壓力。

外圍跌,加上股份市場抽水,今日又有美國最新通脹數字,跟住就聯儲局議息,恒指噚日開市後反覆回落,全日跌438點,低收19463,成交1600億元,科技股有回吐,上星期五大升的美團(3690)食神歸位,跌7%。恒指回落,依家睇只係調整,早前升穿嚿年中伸延落嚟嘅下降阻力,阻力變支持下理論下應為第一防守位,現處於19200水平,加上10天線已上到19080,兩個位頗接近,如果守唔住就要睇上周係位18800,不宜失守。噚日大跌中,升跌股份比例4:6,市寛來看仲係好,反映資金有流向其他股份,好多股份吾到止蝕位都上番去,仲可以坐住。上星期提到的兗煤(1171)企得上25元可留意,尋日開低後逆市企得上25上面收,有d轉勢感覺,可試一小注,但會慢d,第一目標睇27元。

外電指吉利(175)早前計劃分拆高端電動車極氪獨立上市,已秘密申請美國首次公開發行計劃集資逾10億美元(約78億港元)。

據報日本和荷蘭原則上同意和美國一同加強對中國出囗先進晶片機械的限制措施。計劃禁止向中國出售能夠製造14納米或更先進晶片的機械,但日本還需要應對國內企業的反對。

美股在通脹數據公佈前夕反覆上升一,因紐約聯儲銀行調查顯示,消費者預期11月通脹數字會進一步下跌,道指上升528點,納指升140點。

美匯一度抽105.1,最新為104.6,日圓回軟,美元兌日圓升至137.5,歐元1.054,人民幣6.99,再逼近7算。