國統局公佈11月CPI，按年升1.6%，PPI則下跌1.3%，跌幅較預期小，中國未算有通脹問題，反而經濟仍在輕收縮中，加上美元弱咗，所以國家先有條件寛鬆。

恒指上周五再升450點，已迫近20000點了，由低位計，恒指沿住條上升通道上，通道高低距離接近2500點，依家挨近上軸行，預期今個星期通道頂係20500左右，即250天線，去到呢啲大位，應該有幾大阻力，仲有現貨係要分段減，況且上星期三都試過一次走火警，同類情況一定會再發生，所以同指數相關股份一定要候回落時買，中止蝕都可減少損失，上星期五美國ADR時段中概股都普遍下跌，拖累外圍恒指跌了300點。就算炒股唔炒市都好，股份中咗止蝕都要走，好似上星期叫留意的快狗（2246）穿4.6，醫渡科技（2158）穿6.4都要走，康盛（9960）穿2.3可止賺。

理想汽車（2015）公布第三季淨虧損16.46億元人民幣，去年同期淨虧損2,150萬元；非美國公認會計準則淨虧損12.4億元，去年同期淨利潤3.36億元。股價上星期五ADR時段已跌咗12%。

舜宇光學科技（2382）11月手機鏡頭出貨量9103.4萬件，按年跌26.4%，主要係因現時整體智能手機市場需求較淡，按月下跌9.3%。而車載鏡頭出貨量740.5萬件，按年升47.4%，只係上年基數較細，按月則已跌5.3%。

碧桂園服務（6098）主席楊惠妍上周五收市後落實經大摩出售2.37億股，每股作價21.33元，套現50億元。

新城發展（1030）傳以先舊後新方式配股集資，每股配售價3.45元至3.65元，較前收市價折讓10.1%至15.02%。

美國最新PPI升幅放慢到7.4%，核心升幅為6.2%，都較預期為高，美股自十月中開始反彈起，最近三周美股基金已出現走資，12月加息半厘已反映咗，只加25點子機會近零，若加75點子，個市就會嚟個大調整，所以今年美股Christmas rally 早左開始，亦應完，美股上周五都繼續調整，道指跌300點，下面先睇住33000個250天線守唔守到，而標普500都係，上到4100，剛剛遇到歴史高位伸延下來嘅下降阻力就掉頭，下面3867同3790係兩個防守位。

俄羅斯為應對西方國家對其油價設置上限，威脅減產，國際油價彈完就回，紐約期油收71美元，一周累計跌近8%。

美匯104.93，歐元重上1.05，日圓136.57，人民幣6.964。