2023年02月9日

港股前日跌幾多,噚日升番幾多,完美劇本係貼近10天線入市,噚日10天線已經上到18630,估唔到一日升番上去,暫時錯過咗低位買權重股嘅機會,結果指數上番19450收市,升600幾點,成交1,600億元,兩日上落好似發咗一場夢咁。噚日升咗上去,再搏指數破位上值搏率已不大,最樂觀估計係等10天線上嚟,用時間做調整鞏固,今個月就係高位橫行,但其他股份都仲有得炒。噚日中、港、澳三地都有疫情記招,市場繼續炒寛鬆政策,尤其係澳門股同香港零售股,最勁係永利(1128),單日升22%。

科技股中,除大股個幾隻外,升得最好就係幾隻健康股,阿里健康(241)同京東健康(6618)分別上升16同12%。睇番呢幾日講過嘅股份,比亞廸(1211)話咗轉強,前日跌市頂得住,升番比你,收212.6,短期目標照睇225不變。

噚日講嘅撈貨目標都表現幾好,當然佢地高開我都冇入場,但都值得存記,下次大市回落時可參考。康龍(3759)升一成最勁,中軟(354)都彈番6%。係隻兗煤(1171)較差,等佢企穩25元樓上先諗。兩隻殘股康盛環球(9960)升15%,快狗(2246)升7%,後者5蚊樓下任買,收5.2,剛升穿100天線阻力,有機會坐6望7。

醫藥生物股中,大細都行,信達(1801)升一成,加科思(1167)更升23%。同醫療有關的醫渡科技(2158)主要為醫院和醫療機構提供大數據平台,生物科學同健康管理平台解決方案,唔好計上市最高位70蚊,今年年初都有20蚊,股價係10天線上橫行鞏固咗幾日,可吼實,噚日高收,破7蚊可小注一試,上望9.5。

另一個係遊戲板塊,噚日見有錢開始買緊,除咗炒阿爺放鬆監控外,就係疫情防控減輕,會多人中招,留喺屋企冇嘢做就玩手遊,祖龍(9990)先行,落後可留意中手遊(302)同心動(2400),前者暫受制100天線1.7阻力,穿破後可上望前高位1.9元。

美匯104.79,人民幣6.96,日圓136.57。紐約期油72美元。美股反彈183點,納指升120點,而外圍恒指最新報19550,預示港股今早高開約100點左右。