昨日都有提大家套現係為下一輪進攻作準備，亦都講到幾個位比大家留意。一如預期，內地噚日再公佈最新的放寛防疫措施，包括禁止臨時封控，精準劃分風險區域，縮少核酸檢測範圍，而且放寛跨境流動人員陰性檢測同健康碼需要，消息公佈後個市扯上19737後急回，國家政策一向一步步行，噚日放寛後料短期都冇再新一輪鬆綁措施，放一放煙花後就大家鬥快食糊，由高位計最多跌900點，回返大部份星期一嘅上升裂囗，噚日跌得深其實係好事，因如果噚日唔跌，今日裂囗大低開，就係島形頂，殺傷力較大，而家正常調整，雖然19000第一個位穿咗，但10天線正式上破100天線，聽日應該上到18600左右，呢個位已可試買貨，況且向下睇18400唔穿得，一收穿就離場，所以止蝕好近。恒指昨日收18814，跌626點，成交2000億元。

權重股全部先升後出現大棍落，跌市中預期之內，而家係要做功課準備指數再跌落去後，買邊個板塊。噚日提及嘅比亞廸（1211）當然係其中一選，真係破位升到上213，無奈跟個市跌回200元，但都維持微升。其他可放入觀察名單嘅包括微創機械人（2252）、康龍（3759）、中國軟件（354）同兗煤（1171）等。

另外噚日能逆市上升嘅殘股有康聖環球（9960）同快狗打車（2246），後者挾在10天同100天線內等出方向，下面4.6止蝕，上望6元。

美十年債息回落到3.43厘，美匯105.15，歐元1.05，人民幣6.966。加拿大加息50點子，表示係咪暫停加息要再睇數據。美股窄幅上落，係納指相對較弱，都仲要下跌0.5%。紐約期油再跌3%至72美元。