港股急升一日後，噚日隨外圍下跌低開近300點後曾一度倒升，當然高位始終有壓力，指數全日大部份時間都喺19200至19300間徘徊，睇番港股自上星期一起至今呢個升浪，全部係因為炒開關同救內房等消息帶動，咁就2700點，當中都有美元回軟同人民幣回穩呢兩個因素。美股升浪早於十月中開始，到上月底暫時完結，港股延後半個月，配合埋就嚟聖誕大家放假，噚日見主動掃貨都開始減少咗，如果真係驚嘅話，現水平減少持倉，等佢出回吐時再買，現在套現是為了下一輪攻勢作準備。

至於咩位開始可以留意，因個市拉得幾快，10天線今日會升突100天線，勢頭仲係強，第一防守位就係前日裂囗頂部19035，搏佢唔補裂囗，其次就係上升中的10天線，睇住10天線，幾時掉頭落就開始要小心，當然下面最大支持就係前頸線位18400。

呢幾日升嘅股份就回氣中，大股中未行的有比亞廸（1211），噚日逆市上2%，比亞廸一直彈唔起嘅原因係股神沽貨，幾個月內已由19%減到16%以下，其實每日都有花旗牌喺度掛沽，即係減持行動仍然繼續，記得佢第一次公佈減持時，股價單日跌一成，到上一次公佈時跌幅只係2%唔夠，市場已開始消化咗巴郡減持因素。呢個升浪中蔚、小、理三儍股價升幅50%至一倍不等，仲要佢哋全部今年新車交付欠理想，相反比亞廸季季銷售上升，股價低位計升幅只兩成，真係有炒落後誘因，佢係成份股，仲可幫手撐住個市，圖表睇個底已築好，上穿205元頸線可搏上225元。

另外今個浪新能源股份未行過，先頭部隊有機會係信義系，先睇住信義光能（968）先。

碧桂園（2007）未夠一個月內第二度抽水，以2.68至2.75元配售14.63億新股，折讓13.3至15.5%。

紐約期油進一步下跌至74.44美元，美匯105.51，日圓137，人民幣6.988。

美股連續兩日大跌，議息前突然又驚佢冇咁「鴿」，驚就業市場和工資增長強勁，而拖慢通脹回落，道指跌350點，納指跌216點，Meta 跌6.7%，中概股仍然好強，金龍指數逆市升1.3%，令外圍恒指頂得住，相對噚日收市冇上落。