中港股市昨日一齊再起動，上證升55點，高收3200點上面，周末各方面消息都係利好，全國多地都將防疫措施降級，隔離政策寛鬆咗，出去公眾地方免核酸證明，又有地區政府派消費券，加上午後又有消息話星期三國家會有新嘅防疫措施改變，而下年會將防疫級別降為乙級，成個市都憧憬住國內經濟重開，淨係呢個概念好多消費股係一個星期內已升5至8成，昨日見好多都係高位出現長針頂，係要消化下。

恒指昨日高開550點後，頭15分鐘回一回再上過，且愈升愈有，高收19518點，升843點，成交2200億元。噚日真係見到有其他股份接力上，市寛好咗，升跌股份比例接近3：1，港股呢個升浪，一係買最大，一係買最殘，早前跌市中唔跌得多嘅升幅有限。噚日科技股當然係好，美團（3690）最差都4%，小米（1810）好耐冇叻過，殘股反彈，一彈就13%，其他仲有阿里健康（241）20%、平安好醫生（1833）38%。車股中，三儍終有一個似樣反彈，小鵬（9868）最殘，一升就26%。國家繼續有措施幫內房，物管股升幅遠較內房勁，始終係相對輕資產板塊，內房仲有幾多隻係ICU最終救唔番都係一個問題。醫藥股中，醫療器材股造好，藥物股就有壓力。上周提到的中軟（354）已慢慢上到7元，正儲力試衝7.15大位。長飛光纖（6869）亦見開始由低位回升，另外未開始行嘅殘股有中國高速傳動（658），低位橫行左兩個月，現價相對NAV折讓5成，睇下佢幾時翻身。

海底撈（6862）公布，建議透過介紹上市方式將特海國際控股分拆，並於港交所主板獨立上市。

大摩繼續叫人減持美股，加上聯儲局有意調高利率預期直至就業市場明顯冷卻，美10年債息升3.58厘，美匯反彈上105.12，人民幣持續強，美元兌人民幣跌穿7算最新報6.97，日圓136.64。美股應聲下挫，道指跌482點，納指跌2%，而紐約期油亦下跌3%至77美元。

外圍恒指隨美股回落而下跌至約19150水平，預期港股今日低開350至400點。