2023年01月28日

國內疫情開始緩和,由上月27號疫情數字40,000宗,到噚日35,800宗,顯示短期高峯期可能過咗,再配合國家副總理同武漢大學病毒專家都指按科學根據下,omicron 致命病毒率是以幾何級數下降,為未來放鬆疫情管控先打底,但阿爺都要睇住疫情數字穩定落嚟先會有措施改變,唯期望佢日前記者會講嘅快封快開真係做得到,至少可減少對經濟影響。

喺美股助攻下,港股噚日高開19000後,最高搶到上19237,噚日都講,到位後真係會放煙花,煙花過後就一定係平淡,所以話揸住大股高開一定要走,尾市回得更快,個市升完未冇人知,星期一低位到噚日高位已經2400點,下面最簡單,上次阻力同100天線18400升得穿就唔應該失守,要入市就近呢個位買,唯一有啲擔心嘅係大股升完,二、三線股份未見接力上,市寛一般,雖然指數升,但下跌股份唔少,如果資金有信心,應該會不斷尋寶,可能佢地仍然覺得係一個反彈市,對risk-on仍有保留。

美國今晚會公佈最新失業率同大非農數字,而噚晚嘅11月製造業指數和製造業採購經理指數都係20年5月最低,顯示經濟正開始收縮。美股下跌194點,納指微升。紐約期油81.5美元,美10年債息回到3.5厘,美匯104.6,日圓續強,上到135.1,英鎊1.22,人民幣7.0367。